We are #1 on Social Media

CCECC off loadem Machines

Gavman blong Vanuatu i givim 10 dei long ship we i karem agriget blong klinim ol masin we oli stap long ship ia bifo i aot long solwota blong kantri long nara destineson blong hem from i stap long-taem tumas naoia long solwota blong Vanuatu wetem ol agriget we Vanuatu i banem blong i kam soa.

10 deis ia i stat long yestedei Tuesday 13 Septemba, mo hemi blong ship we i anga long Mele bay naoia, i ko aotsaed 12 notikol mael long aelan blong Efate mo klinim aot ol graon we i fas i stap long ol masin bifo i offlodem i kam soa long Port Vila blong wokem Bauerfield Intanasenal eapot.

Ol otoriti olsem Dipatmen blong Baeo-sekuriti, Immigreson, Kastoms, Ports & Haba, Ministri blong agrikalja, Vanuatu Projek Manejmen Yunit mo kampani blong China we i impotem ol agriget ia oli sidaon long miting blong olketa long Mande wik ia mo konklud wetem ol kondison ia.

Darekta blong Baeo-sekuriti, Timothy Tumukon, i talem se long las Satudei, oli oflodem ol masin we i sidaon long hae dek blong ship be ol nara masin we i sidaon long loya dek, oli mas klinim fastaem bifo oli kam soa long Port Vila blong oli save yusum blong wokem Bauerfield Intanasenal Eapot.

Source: Gabriel Vusi Lai