We are #1 on Social Media

Gavman blong Vanuatu i saenem wan Supavaesing Enjinia Kontraks blong Vanuatu Avieson Investmen Projek wetem wan enjiniaring grup GHD Ltd we i beis long New Zealand.

Minista blong Infrastakja mo Pablik Utiliti, Jotham Napat, mo Russel Hawken, ripresentetiv blong GHD Ltd i saenem kontrak ia long Ministri blong MIPU.

Ol ki man blong kampani ia, bae oli kasem Port Vila long wik ia blong statem impoten wok blong supavaesem ol wok long Bauerfield Intanasenal eapot.

Ofis blong Vanuatu Projek Manejmen Ofis – VPMU, i ripotem se Minista Napat i kongratuletem GHD long saksesful selekson bifo saening mo hemi talem se Gavman blong Vanuatu bae i rilae long expetis blong kampani blong mekem sua se projek ia oli karem aot saksesfuli.

Minista Jotham Napat, i rikuestem tu Vanuatu Projek Manejmen Unit mo lokol projek manejmen tim blong finisim evri neseseri pepa i ko long kampani blong New Zealand ia blong oli save ol projek rikwaemen.

Rol blong GHD kampani blong New Zealand, hemi blong mekem sua se ol kontrakta olsem CCECC mo Northwest Civil Eapots Konstrakson JV i karem aot Vanuatu Avieson Investmen Projek folem disaen spesifikeson mo witin long kontrak we oli bin saenem long Manis May 2017.

GDH kampani i bin supavaesem ol semak wok long rijon olsem Papua New Guinea, Cook Aelans mo Solomon Aelans.