Pablik Rilesen Ofisa (PRO) blong gavman, Kierry Manassah, I talemaot se big wari I stap yet tede insaed long Vanuatu Broadcasting mo Television Coroporation (VBTC).
Long wan pablik stetmen blong hem, PRO Manassah I talem se I no problem blong redio caverage nomo we fulap aelan long Vanuatu I no save kasem seves blong radio, be hem I talem se nara issue hem I VBTC I gat tumas staff.
Bifo krismas finis, Bod anda long lidaship blong jealady Jennifer Kausei, I bin infoemem ol staff blong VBTC finis se bambae I gat wan restructuring, mo wan wan long olgeta I save aplae bakeken sapos I wantem kontinu blong wok wetem VBTC.
Mista Manassah I talem se bambae I gat wan task force I visitim VBTC along ol wik we I kam blong lukluk bak wok blong wan wan staff mo wanem kampani ia I stap provaedem I go long pablik. Bambae task force I lukluk tu long saed blong ol liscence we I stap givimaot mo regulesen blong VBTC.
Yumi Toktok Niuspepa I andastan se wan nara issue tu we I need blong lukluk long hem hem I posisen blong General Manager, afta we six yia kontrak blong GM Fred Vurobaravu I finis long las yia.
Gavman wetem Bod blong VBTC I stap lukluk blong apoenem wan GM we I gat capacity blong draevem big kampani blong television mo broadcasting ia forward.
Gavman I stap givim 45 milien Vatu grant evri yia I go long VBTC.
More Stories
Crown of Thorns Destroying Our Port Vila Harbour, Bakokoto.
Father given 4 years for raping his daughter
Earthquake of magnitude 7.2 near Vanuatu, no tsunami warning