We are #1 on Social Media

Pablik wandem Gavman appointem wan strong Polis Komisina

Gat sam ripot kamaot akensem ol polis ofisa folem wan insiden lo Rumours Nite Club lo las wiken lo sarera nite. Ripot kamaot lo sam memba blo pablik we oli witnessem tu pleia blo Amicale FC, Samuel mo Tuilau blo Fiji mo sam Polis Ofisa we oli stap tring lo Rumours nite club.

Taem club hemi klos tufala pleia blo Amicale ko oatsaed mo gat sam toktok kerap mo hemi lukim wan Polis Ofisa we nem blo hem Ronney involve lo wan fite wetem tufala Fijian pleia blo Amicale.

Taem Tuilau fitem Ronney, hemi ron ko lo Polis stesen mo karem ol polis mo keij trak I kam nao oli putum tufala lo trak mo karem ko lo polis stasen. Tufala pleia kasem sam injuri we tufala klem se ol Polis bin killim tufala lo stesen.

Toktok we kamaot lo Ofis blo Polis oli talem se ol injuri we kasem ol pleia ia hemi no kam lo any aksen we Polis mekem mo tufala pleia ia kasem kil taem oli trong stap fol daon olbaot. Gat smol investikesen stap ko hed mo nao ol Polis stap lukluk lo hem.

Lo sem wiken wan memba blo Pablik hemi witnessem ol Polis arrestem wan yangfala boy from hemi stonem trak blo Polis. Man we putum ripot we hemi no wandem nem blo hem kamaot from lukaot ol Polis lukaotem hem, hemi kontinu blo talem se “hemi stopem wan yangfala boy afta we hemi kamaot lo Polis Stesen mo askem lo hem se wanem happen lo face blo hem from se face blo hem fulap lo blad”

“Yangfala hemi talem se ol Polis oli holem tite mi finis oli killim mi.” Nekis dei ol uncle blo boy oli ko lo haos blo wan lo ol Polis ofisa mo askem hem se oli killim nogud yangfala boy ia from wanem. Polis Ofisa ia we nem blo hem Jean, hemi stap seksek nomo mo no toktok be stap talem sori ko lo yangfala boy.

Ol family blo yangfala boy ia askem Polis ia se “Yu kikim brekem hed blo boy blo mifala wetem safety, afta bae yu pem blad blo hem wea taem? Polis Ofisa hemi ansa se “Mi nogat mane”

Minista Ralph Regenvanu hemi kamaot tub lo talem se bae Gavman jensem Polis Act lo palamen lo en blo manis ia blo allaoem wan forena kam Komisena fole fulap samting we stap happen insaed lo Polis Fos.