We are #1 on Social Media

SFA i mas wok hat blong leftemap futbol blong hem

‘Sanma Football Association’ i mas wok hat naoia blong defendem intres blong futbol long Sanma Provins.

Sanma ‘Telecom Vanuatu Limited Cup’ long Soccer City Stadium long Luganville we i komplit long Tiusde wik ia (22 August, 2017) i kam olsem wan fandresing tunamen be emi no riflektem stret mining blong em, olsem wan tunamen blong faenem tri (3) best futbol klab blong Sanma Province from 2017 ‘Vanuatu Football Federation National Super League’.

Difren risej blong YTS Sport tim long manis ia i soem se karen ekskiutif blong SFA we Jacob Stanley i lidim ino Kat kapasiti blong ranem SFA olsem wan organization, mo disentrelaesem futbol long Sanma olsem we FIFA, OFC mo VFF i stap prijim.

2017 Sanma TVL Cup long manis ia ino Kat stret skrining long ol klab we i kompit long tunamen ia, ikat sam klab i afiliet be samfala oli joenem tunamen ia tru long ol invitesen nomo.

Ol faendings blong YTS Sport i soem se ol nara bik otoriti olsem VFF, Sanma Province mo ol nara football stekholda i mas wok kwik taem blong putum bak futbol blong Sanma long Stret rod bakaken.

TVL Cup tunamen emi wan kompetisen we i stap hapen evri yia blong ol ripresentetif blo wanwan ‘Member Association’ blong kompit long NSL kompetisen blong VFF, mo Sanma TVL Cup long Soccer City Stadium long Luganville, i kat tri tim we i kwalifae from VFF NSL tunamen ia.

Faenal standing blo 2017 ‘Sanma TVL Cup’ i soem se Vanmolmol FC blong Canal Fanafo Area League nao emi kam jampion wetem wan ‘cash price’ blong 50,000 vatu, rana-ap blong em emi Spider FC blo Malo wetem wan kas praes blong 30,000 vatu, mo namba tri posisen i ko long Veoa FC blong Tutuba wetem wan kas praes blong 20,000 vatu.

Trifala klab ia nao kwalifae from 2017 VFF NSL kompetisen, we bae i kickof long manis Septemba 2017.